حچاية التنگال

سعد العبيدي

 عبد زيد رجع البارحة للبيت ضايج، ومن سألته مرته: هاي اشبيك وجهك ما يگصه الطبر؟گاللها: مو تدرين عندي وكالة عامة عن صبري؟ رَدَتْ: إي أدري.

گال: وتدرين الوكالة مثبته بالبنك العراقي للتجارة (TBI)، وهاي صار سنتين أودع للرجال وأسحب فلوسه بهاي الوكالة. ورحت الصبح مترهي دا أودعله نص مليون بفرع الأعظمية، فطلب الموظف الوكالة. قدمتها مسلفنه.

گال: هاي مال قبل سنتين.

گتله: إي، هاي عامة، ما تسقط إلا صاحبها يسقطها. رد بعصبية: هاي شنو تعلمني؟وما أطولها عليچ، أصر على أن أروح لكاتب العدل الي سواها حتى يثبت عليها هذا الحچي ويختمه. ورحت عليه بالكرادة، فالرجل باوع عليها وگال: عمي هاي سارية المفعول.

ترجيته يثبت عليها رأيه ويختمها بختم هاي السنة، فضحك وگال: اشلون أسوي شي هو قانونًا ساري المفعول؟ إرجع للموظف وانقله هذا الرأي. ورجعت وحچيت بكل التفاصيل. انوب أصر بالزايد وما قبل يتفاهم.

والله آني هم صرت عصبي، گتله: مو صوچكم، صوچ الي يخلي فلوسه يمكم، وچماله تتباچون سيولة ماكو، إنتم الي دا تخربون البلد. وعفته ورجعت، وطول الطريق أفكر معقولة موظف، وببنك شغله فلوس يشتغل بهاي الطريقة تْهَزِم أهل الفلوس.