حچاية التنگال

سعد العبيدي

أزمة المدارس وإزدواجيّة الدوام بيها، وعدد طلاب صفوفها، مو جديدة، لكنها زادت وتضاعفت بعد 2003 رغم مرور العراق بفترات نعيم گامت بيها الدولة تكرّفْ الفلوس بالزنانبيل، والي شفناه بعد ذيچ السنين كل حكومة تجي تخلي المدارس والتعليم والتطوير شعار تتعكز عليه، وبالنتيجة تطلع هي مزيّدة نسبة الضرر واللواص بيها. وتكرار هذي الأزمة واستمرارها ما اله غير تفسير واحد هو أن السياسي العراقي الجديد المتدين مو بس ما يهتم بالتعليم الي أساسه المدارس، وانما يتعمد التجهيل حتى يحول الأجيال الى قطعان من الغنم تمشي وراه دون ان تسأله وين رايحين. والا معقولة التربية تطلب من أولياء امور التلاميذ المساعدة بالتبرع، وميزانيتها مليارات الدولارات بزمن السوداني، والي قبل السوداني والي قبل قبله، ومحد گدر يسألهم وين راحت الفلوس وليش ما حليتوا ولو نص ربع ازمة المدارس. وهاي هم ما الها غير تفسير واحد هو ان سياسيين هذا الوكت حصلوا مكرمة من رجال دين هذا الوكت وشملوهم بالعصمة.