حچاية التنگال

سعد العبيدي

شباب إيرانيين معتدين على طلاب عراقيين خارج الجامعة بمحافظة سمنان الايرانية، ما اكتفوا بنتائج المعركة الأولى تعادل. لأنهم بالأصل يكرهون التعادل من زمن حرب الثمان سنوات الي طلعوا بيها متعادلين بالخسارة ويه العراقيين. المهم المعتدين راحوا يركضون وجمعوا أكثر من (150) عاطل وهجموا على القسم الداخلي للطلاب العراقيين وگدام الشرطة، ضربوهم وكسروا أثاثهم، وقبل ما يطلعون باگوا فلوسهم. دگة منين ما تباوعها تگول مو صوچ الإيرانيين الي يتعلمون الحقد على العراقيين جيل بعد جيل من حرب القادسية ونهاوند، وأم الثمن سنين ولليوم. صوچ الدولة العراقية الي فتحت الدراسة بإيران بدون ضوابط وهي تدري الدراسة بهواي من الجامعات الإيرانية بهذا الوكت سحگ، ومو شرط الحضور والنجاح بفلوس، والاطاريح تكتب بمكاتب بفلوس.. وصوچ الطالب وأهله الي عافوا العالم وراحوا على الرخص بإيران، وهمه عارفين هواي من الطلاب راح يتخرجون مهانين وجهلة ينضافون لآلاف الجهلة العاطلين.