حچاية التنگال

سعد العبيدي

هسه إنتو يالحكومة الاتحادية، اجيتوا وسديتوا منفذ الشيب، غير تطلعون للناس وتگولون ليش، وشنو السبب القوي الي خلاكم تسدوه؟ أشو مرة تگولون لأغراض فنية، ومرة ترجعونها على القضايا التنظيمية، وثالثة تذبوها براس الإدارية.

شنو تستحون تگولون المنفذ صاير خري مري، والإيرانيين الي ضربوا خط النفط السعودي دخلوا منه مسيّرين، همه ومسيراتهم ومعداتهم، بلا جوازات ولا أوراق، نفذوا ورجعوا من غير إحم ولا دستور؟

شوفوا دگتكم هاي إشلون خلت حكومة ميسان بجعويلها، تتمرد عليكم وتهدد الدولة بسد الطرق وعزل المحافظة وإعلان استقلالها عن الدولة العراقية. وچمالة إنتو وياهم من نفس الطينة، إطار بإطار.

ما حسبتوا إذا استقلت اشلون راح يستمر العراق؟ اشلون الناس في باقي المحافظات تعيش؟...

تره صدگ إطار ميسان دهاة، ويفكرون بعيد، ومتوقع إلهم يأسسون المدينة الدولة أحسن من الفاتيكان وموناكو، وغيرهن من الدول الي كل وحدة منهن أصغر من العمارة بهواي، وإلهن أعلام، وحكومات، وعضوية بالأمم المتحدة...سيروا بدهائكم هذا إلى الأمام، وليخسأ الخاسؤون!!!