حچاية التنگال

سعد العبيدي

في كل البلدان الي تحترم نفسها، تنفتح الجامعة الأهلية أو الحكومية بعد سؤال طويل عريض: شنو الي يحتاجه المجتمع حتى يتطوّر، ويطَوّر نفسه، ويستمر بقدر مقبول من الاستقرار والرفاه؟ وشنو الي يريده سوق العمل؟ وأكو أساتذة وكوادر ومختبرات تكفي وتلائم الفتح؟ أما في العراق الديمقراطي، فماشين على طريقة شربت لحميدة بفلسين، يعني كلشي من هاي الأساسيات المذكورة ما تجي ببالهم.المهم أكو حزب يعرف الله وخاش بالدين يشرّع ويسند، أو فصيل مسلح مجرّب بيوم الوغى يحمي ويقاتل من أجل العلم والتعليم، أو سياسي معروف بمواقفه لبناء العراق العظيم يوگف وره الجامعة ويسندها، وفد بناية مزروّقة، ولافتة مذهّبة، وحساب بالبنگ يلم الدخل من جيوب المضطرين.

ما يحسبون حساب البطالة وعدد الخريجين التايهين بالسوگ، والي زاد عددهم على الوظائف عشرات المرات، ولا يتذكرون المصانع الي سدوها بوجه التوظيف. المهم يفتحون، وظلوا يفتحون، ويستغلون كل الفرص حتى يفتحون. وآخرها بهاي الأيام، والي بجرة قلم وحدة، فتحوا (15) جامعة وكلية أهلية، راح تلتحق بموكب التجهيل والحرمنة وغسيل الأموال...أما حميدة المسكينة فيطبها طوب.