حچاية التنگال

سعد العبيدي

البارحة بالگهوة گعدوا يتناقشون على الأسماء الي صوت عليها البرلمان، فواحد سأل: أگلكم، مو الأمريكان چانوا معترضين على بعض الأسماء، خاصة السيد النائب؟

رد عليه أبو رفيف : لا غيروا رأيهم ونطوا موافقة.

فجاوبه: أگلك، هذا الحچي ما يخش بالعقل، هي لعب خوما لعب.

بطل أبو رفيف الخوط بالاستكان وگله: آني أگلكم اشلون، بس كون تسمعون للآخر، ولا أحد ينبنب... شوفوا، من راح الوفد الرئاسي لأمريكا آخر مرة والتقوا بترامب، واحد من أعضاء الوفد چان بالأصل مهوال.

وبالگعدة ارتجل وگال:  لأبو فيانكه جينه وتعنينه.

نفش ريشه ترامب وگال: مية هلا بأهل العراق، آني أحبكم، إنتو خوش أوادم... إبشروا.

فتشجع المهوال، وبده يحچي عن يوم السيادة، وگله:  بمناسبة هذا اليوم إجيناك وأملنا بيك يا طويل العمر، أن توافق على المرشحين المقاومين، حتى تكمل السيادة الي تحققت بفضلك.

عدل گذلته ترامب وگال: يابه، تره آني ويّه السيادة، وما وافقت لأن ذوله راح يشتغلون لصالح إيران، ويضروكم ويضرونه.

رد عليه: لا مولانه، تره تابوا، ورجعوا للصف الوطني، وصاروا من حماة السيادة.

وبصوت حنيّن، ترامب سأل:  تتعهدون بيهم؟

فمد المهوال إيده على شاربه وگال: إخذها من هالشارب.

عندها أعطى ترامب موافقته، وقبل التوديع گالها بترس حلگه: والعباس راح تنضربون بوري!!