الحكومة والمجلس دهن ودبس

خليل ابراهيم العبيدي

المثل الشعبي المصري  ايگول سمن عل العسل ما في مشاكل ما في زعل، او مثلنا احنة العراقيين، ايگول دهن أودبس، زين، والله زين، ماكو وجع راس للمواطن كل يوم استجواب اوكل يوم للفاسد حبس، اوكل يوم رايحين جايين، دورة برلمانية كل واحد ملتهي ابنفسة، الحكومة حايرة بالتقاطعات والجسور، بالگوة ادبر الرواتب والاجور، والمجلس حايير بكسر النصاب، اومنع الحضور، الحمد لله دهن اودبس، مو مثل الكويت يومية هرجة اوعرس، الرييس مرتاح، لا مراسيم حل البرلمان، ولا مراسيم تبديل الوزراء، أمير الكويت بطران كل مدة يزعل ويحل البرلمان، عدنة الحكومة متفاهمة وية البرلمان، خلي الميزانية عدكم، اصرفوا شلون ماچان، واحد /12، خوش بدعة او خوش عنوان، مشي السفراء، شو لغة شنو كفاءة، خليهة بس على الاهل والأخوان، السر  منريدة يطلع برة لو نعيين ياهو الچان، خوش دورة او خوش برلمان، واحد ايعبر للثاني، مو مثل كير ستارمر. بدل وزير الخارجية ليرضي البرلمان، هو مايفتهم، الفهم عدنة أيخر من الاذان، والدورة الجاية إنشاء الله ما بيهة نايب نحس، خلي البرلمان عدنة وية الحكومة يبقون دهن اودبس.