حچاية التنگال

سعد العبيدي

هم رجعنه لنفس الحيرة، وندوخ نفس الدوخة: بيمن نصدّگ؟

بتقارير الأجنبي الي بدت تسربها جهات استخبارية دولية، ممهورة بصور أقمار صناعية تگول أكو خطوط لتهريب النفط من أنبوب النفط الحكومي، وبشكل منتظم بتناكر تطلع من الجرف تحت حماية فصائل مسلحة مسيطرة عليه، وتوصل لبغداد، وهناك تخبط ويّه تناكر الدولة، وبعد ما تخبط تگوم تبيع براحتها؟ وهذا الحچي صارله سنين، يعني من يوم الي تحرر الجرف من الإرهاب ولهذا اليوم.

لو نصدّگ السيد محافظ بابل، الي هو منّا وبينا، لمن يگول: لا يابه، لا، مو هيچ الحچي. الحچي الصدگ هو أن التناكر والخراطيم والمضخات والتنكات الي طلعت بالصور هي بانزين خانة لتزويد آليات الحشد، والشرطة الاتحادية بالوقود. وگبل ما نصدّگ الأجنبي لو ابن البلد، نسأل السيد المحافظ: هو إنت تگدر تهوّب للجرف، حتى سيارات الشرطة تطب بكيفها، تفوّل وتطلع؟

ونسأل أهل السيطرات: اشلون التناكر كل هاي السنين رايحه جايه، ولا سيطرة من سيطراتكم شكت بيها وسألتها: شمحمّلين ووين رايحين؟ ونترحم لعبد السلام الي وثق الحالة قبل حواي (68) سنة لمن بخطابه بالبصرة گال: طاسة ببطن طاسة وبالحر ركاسة.