حچاية التنگال

سعد العبيدي

بعد فضيحة عقود الوساطة للفصائل المسلحة بين التصنيع والشركات الي تجهزه بالمواد الأولية، والي ضاعفت كلفة الطلقة الي تشتريها الحكومة من التصنيع، وخلّت الكلاشنكوف الي يجمعها التصنيع أغلى بهواي من الكلاشنكوف الجاية من روسيا سرمهر، والي وقفها رئيس الوزراء بأمر سلطاني، طلعتلنا بعدها على طول عقود الخماطة لفصائل ثانية ويّه مطار الموصل: ثلث عقود، والي هم ألغاها رئيس الوزراء بأمر آخر.

وهاي العقود قصتها قصة... والي يباوع بيها من قريب راح يعرف أسلوب الجماعة الفريد بإدارة الدولة الغريب. لأن الحكومة المحلية لنينوى، المسؤولة عن الموضوع، تگول: تره إحنه ما إلنه لازم بهاي العقود، انفرضت على المطار فرض، بفرمان جانه يوّر من وزارة النقل، وصار التعاقد.

وهاي القصص الي بدت تطلع بعد موجة الخلاف والاختلاف داخل الإطار الي يدير الدولة، تخلي الواحد يسأل وبحرگة گلب:

لعد الفصائل الي حمت الأعراض، وين مادين إديهم بثوب الحكومة، وليوين واصلين؟

وإذا عدهم هلگد عقود عوجة، وبهذا المستوى، لعد الحكومات الوطنية والديمقراطية التقدمية وين چانت؟ وأجهزتها الأمنية والاستخبارية إشدا تسوي؟

معقولة لا تسمع ولا تشوف؟ لو دا تشوف، لكنها لا تهش ولا تنش؟