حچاية التنگال

سعد العبيدي

إبشروا يا جماعة الخير، وخلي حاضركم يبلغ الغايب: الي ناوي يحج والي بباله يحج، والي عن ابوه يريد يحج، بعد ما كو أي مشكلة بالحج، ولا أكو سياسي يگدر يكسر سرة الحج، حتى يصفر ذنوبه ويرجعلكم الأنگس. لأن فخامة الرئيس استقبل رئيس هيئة الحج والعمرة، وأكد ضرورة الارتقاء بالخدمات وتسهيل الإجراءات وأداء المناسك بانسيابية.  هاي كلها والمنصب شرفي، لعد لو المنصب مو شرفي، بربكم مو چان انحلت مشاكل الفساد والانسداد والتلوث والسلاح والإصلاح، وكان ما تجرؤا دول الخليج استدعاء سفرائنا بليّه صوچ ولا ذنب، ولا البحارنة يفكرون يوصفونا بجمهورية الموز وإحنه الحديد، ولا گدر قآني ولا باراك يطبولنه بدون ڤيزة دا يعينولنا رئيس وزراء، ولا .... ولا.

سيدي الرئيس كل الي نريده منك إشارة وبس: أن الي دا يصير بعد الانتخابات من تجاوز المدد بتشكيل الحكومة هو خرق للدستور وأبوك الله يرحمه.