وجوه تتغيّر وفساد مستمر

لمياء العامري

ثراء خطط وبلاغة شعارات إصلاحية وغزارة طروحات مفرغة من محتواها، «وَمِنَ النَّاسِ مَن يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ وَهُوَ أَلَدُّ الْخِصَامِ» الآية 204 سورة البقرة». كل فترة يبدلون وجوه لمجرد إيهام الشارع، بس الواقع يبقى مثل ما هو بل وينحدر للأسوأ نفس الفساد بوجه وإدارة جديدة.. اللي ديصير فعلياً أن الناس تتوقع إذا تغير رئيس مجلس الوزراء أو الوزير، كما يحدث الآن في حكومة علي الزيدي، يعني المؤسسة تغيرت بس الحقيقة مو هيج لأن القرار الحقيقي مو كله بيد المسؤول، ولو كان صادقاً ونزيهاً، أكو طبقات مدعومة ومسنودة داخل المؤسسات هي اللي تمشي الشغل فعلياً، وهي التي تمسك التفاصيل والأموال والمعاملات، فداخل أية وزارة تلكه قسم العقود اللي يحدد منو ياخذ المشاريع، والمالية التي تحكم الصرف والموازنة، والتخطيط الذي يرتب القرارات، ورؤساء الأقسام اللي يمشون الشغل اليومي، هذولة هم محرك الحقيقي للمؤسسة أو الوزارة والمسؤول مجرد واجهة لا أكثر، ولهذا أحيانا يجي مسؤول نزيه بس يرتطم بمنظومة فساد جاهزة ما يكدر يغيرها بسهولة؛ لان كل شيء منظم ومدعوم ومترسخ قبل ما يتسنم المنصب، وإذا حاول يبعدهم راح يحارب بشتى الاسلحة. ولهذا المواطن حائراً يتساءل: ليش الفساد مستمر برغم تغيير الوجوه؟

والجواب الحقيقي، هو أن الفساد في العراق ما يمثله شخص واحد ولا جهة وحدة، إنما شبكة داخل الدولة نفسها يعني موظفين ثابتين من سنين.. علاقات ومصالح داخل الأقسام.. شركات ووسطاء خارج الدائرة، حتى لو تغيرت القيادة تبقى الشبكة تشتغل بنفس الطريقة، بوجه جديد والتغيير يبقى شكلياً لأن العقود القديمة تبقى تمشي والإدارات نفسها ما تتغير ونفس الناس اللي تمسك الملفات تبقى بمكانها فالنتيجة تصير تغيير بالاسماء بس نفس النظام يشتغل. بإختصار، إذا تريدون إصلاحاً حقيقياً ومو مجرد كلام لازم يصير شغل عميق مو سطحي يتضمن فتح ملفات الفساد الكبيرة والصغيرة في جميع وزارات الدولة وأهمها النفط والكهرباء والدفاع والداخلية والمنافذ وجميع العقود، وكل عقد لازم يدرج بنظام ألكتروني واضح متاح للجميع، بالإضافة الى ملف الرواتب، يجب الإسراع بإقصاء الفضائيين والرواتب المزدوجة والرفحاويين وعمل قاعدة بيانات واحدة لكل الموظفين من الشمال الى الجنوب.كما يجب تقليل الترهل في مؤسسات الدولة ودمج المتشابهة لتقليل الوظائف الزائدة وتنظيم الجهاز الإداري.